最近工作十分繁忙，原本仲有好多往日之所見所聞都要暫且束之高閣，直至今日，終於有機會同時間能夠再跟大家見面，今次既topic都係有關慈雲山既回憶—「中央球場」。

首先不得不提往日慈雲山既歷史，1959年，政府開始發展慈雲山地區，包括移開數個不同大小山坡，當中有「浦崗村」（今日既浦崗村道）、以及「斧山」（斧山道）一帶，當時政府除了於山腳劃出多幅地皮予多個私人財團發展外（即現今之鳳凰新村），山上則為發展大型徒置區以安置紅磡山谷道木屋區、觀塘木屋區居民。直至1960年底止，「慈雲山徒置區」共有五十八座，星羅棋布於不同山坡之下，及後於1972年房委會成立後更名為「慈雲山邨」，為香港最大型既屋邨之一。

基於人口眾多，必須有一個較為大型既康樂用地以供巿民使用，於是，當局於徒置區第47、48座對面規畫一塊空地建成一個大型石地足球場、數個籃球場既公園，並命名為「慈雲山中央遊樂場」。通常住響慈雲山既人都會稱之「中央球場」或者「中央公園」。

由於以前既徒置區並無足夠既康樂設施，就連籃球、足球場都欠奉，以前既慈雲山就係個好例子；記得舅父們曾經講過，以前佢地放學後要打波或者踼波，除了去德愛中學隔離既球場外，就只得「中央」可去，所以當時既中央球場每逢下午放學時段就會變得非常熱鬧，無論中小學生也好；踼波打波也好，你會見到不同學校既校服出現，顏色各有不同，有點似「校服聯合國」。由於每日去玩既人太多，要玩球類活動實在頗為困難，舅父講過，人多果陣踢波「跟隊」玩要等好耐，有時等一兩個鐘先輪到自己玩。但跟隊玩既人大部份都好有規矩，有時如果對賽既隊伍質素強勁，跟隊果陣可以順道坐低睇波，而側邊幾排座位一定坐無虛席，一邊跟隊一邊睇波，可謂賞心樂事。

不過，球場人多熱鬧自然引起不少問題，舅父曾經講過，除了間唔中有「球場老鼠幫襯」偷書包銀包外，球場亦成為黑社會「收靚」、踼學生入會既理想地，入夜後更加係慈雲山傳統社團「吹雞」聚集、講數劈友既地方，點解會咁？皆因中央球場位於慈雲山既中心地帶，四通八達，球場能夠直通唔同既地方，所以「皇氣」殺到「散水」可以好快，因而助長社團於慈雲山既勢力，由此可見，當年慈雲山曾被外界稱為「紅番區」或者「生番區」並非浪得虛名，而當年「中央公園」既「名氣」，亦是傳遍各區。


直到八十年代，由於警方多年打擊成效甚佳，黑幫於該區既勢力收斂之餘，加上慈雲山區開始重建，中央公園開始變得寧靜起來。不過，每當一年一度既孟蘭節又到，「中央」又會變得熱鬧起來，搭戲棚做神功戲同潮劇，能夠吸引不少街坊欣賞，場面熱鬧非常。記得一年既孟蘭節我仲係得四歲到，果陣父母將我同「肥仔」二人送到阿婆度到跟表哥表姐一齊住一晚，晚上阿公想去睇潮劇，就帶埋我地幾個一齊行上去「中央」玩，我地果陣細個唔知道大戲係乜野黎，只知道有得玩、有得督魚蛋食就好開心，就算行上去路途比較遠都覺得無乜所謂。

記得當時既勝會側邊有好多車仔攤檔：炸魚蛋、煎釀三寶、比出面賣更臭更好食既潮州臭豆腐、炸椰汁庶汁（有個攪拌機轉下轉下、有一枝大光管照住果隻）、傳統炭燒雞蛋仔、牛雜炸大腸、碗仔翅生菜魚肉、涼果檔、串燒、炒米粉……等等風味，實在一絕。


宜家如果行經旺角銅鑼灣既話都會見到賣以上幾類小食既鋪頭，不過，經已失去原來街邊「走鬼風味」，我就算肚餓，亦是無意欲走去買黎食了。


今日，中央球場仍然存在，不過舊區風情卻早已面目全非。

（如需轉載，敬請通知本人波比星。電郵 這個email住址已經被防垃圾郵件程式保護，您需要啟動Javascript才能觀看 ）

最後更新 : 29-10-2007 10:31

關鍵字 : 慈雲山

用戶平均分

   (0 投票)

顯示 2 / 2 留言