記得細個果陣，阿媽好多時湊我同阿哥「肥仔」放學後，都會到慈雲山探我阿婆。

阿婆係住響舊式既屋村，無電梯可坐，幸好只係二樓，所以行上去一點都唔困難。廁所係要羅鎖匙出去走廊公用果隻，果陣因為仲有好多舅父同阿姨未結婚，所以阿婆屋企當時仲係好熱鬧，成日都有幾台麻雀打。

有時候下午見到舅父同阿姨早放工番黎，佢地都會帶「肥仔」同我落去樓下買零食，有時甚至會帶我地去樓下近遊樂場果間「銀泉冰室」（記得）度食「波羅油」，因為舅父曾經話過，果間冰室既「波羅油」係慈雲山相當出名。因為呢間冰室阿公同舅父佢地成日都會去食，加上當時既老闆娘都係「樓上樓下」，正係睇住我班舅父同阿姨大，所以佢地入親去實會傾計、食煙、講馬經，有時候舅父佢地踢完波，會去冰室歎冷氣睇電視，可能只係會「飲杯茶食個飽」，但坐幾耐都無乜所謂唔會被人趕走。全因為，大家都係老街坊。

記得「銀泉」所出既波羅包都係新鮮出爐，絕對無隔夜，整波羅油係用傳統動物牛油，熱辣辣溶響包心之中，既香而滑，同宜家巿面多數用平價而食落或者會feel到點點化學味既「瑪字甸」（人造牛油）味道差好遠！所以好多人入黎冰室都會叫呢個簡單又可以頂肚既「點心」。


除此之外，舅父果陣總係會叫兩杯「忌廉溝鮮奶」比我地飲，以前細個只知道佢既味道好怪，但好甜好好飲，又似汽水，又有鮮奶裡面滑滑既感覺，後來聽舅父回憶道，佢好飲既原因係鮮奶同忌廉既分量溝得剛剛好，氣唔會太多，而奶又唔會撞開既有忌廉汽水既味道，對比現今巿面上既「忌廉溝鮮奶」，要麼忌廉太多，要麼鮮奶太多，有如「豬八戒照鏡，兩面不是人」一樣。

可能有人會話，除左「忌廉溝鮮奶」外「波羅油」既味道實在係「各花入各眼」無既定標準，甚至來自不同地區既人，或者會認為自己區也有好好食既「波羅油」；不過，回憶既其實並非係細時食過既茶餐廳食品，而係已經失落已久，也許要到一d快將消失既舊區先可以回憶到既，正是那份有舊社會街坊人情味既溫暖。

最後更新: 01-10-2007 00:38

百多年填海六次　指示牌逐一標示   灣仔街頭可尋已逝海岸線(蘋果 日報,2007/9/28)

【本報訊】灣仔在過去百多年來共填海六次，隨海岸線的變遷，該區已面貌全非。灣仔區議會在區內主要道路設立了28個代表歷年海岸線的指示牌，連成一條海岸線遞變的文化徑，讓市民及遊客可以追溯灣仔滄海桑田的歷史回憶。記者：馮永堅、麥志榮

最後更新: 28-09-2007 11:02

D張照片實際不是太舊 (1983)

最後更新: 28-09-2007 09:48

70年大宅體無完膚　結構未損   港府願出4億買景賢里(蘋果日報, 2007/9/27)

【記者呂焯均報道】70年歷史大宅景賢里的新業主迄今仍保持神秘身份，古物古蹟辦事處視察內部後，發現牆身以至橫樑上的仿宮廷雕刻都被挖破，最過份是每一 處都挖一挖，令屋內無一部份完整。政府消息人士說，港府認為景賢里仍值得保留，也初步同意以4億多元「買斷」景賢里的未來，「塊地估價都值4億幾，業主如 果要補償，應該唔使蝕，但當然希望業主支持保育而肯接受較低補償啦！」

景賢里雖已傷痕纍纍，但港府認為其結構完整，仍值得保留。韋志滿攝

港府初步評估後，願意以4億多元代價換取景賢里的命運。

最後更新: 27-09-2007 12:54

講起上黎，細個過中秋節唔係最鐘意玩燈籠，係鐘意玩煲蠟同一年一度買「十一米巴士膠燈籠」。

以前有隻「雙層巴士」膠燈籠，我一定會「唉」我阿媽買加，因為又可以著燈，又可以推，我又鐘意巴士，滿足到我三個願望。

後來再大一點，年年中秋都會落街玩，原本就係羅幾個燈籠去點下，羅個月餅罐去點下蠟燭，不過都會先意外「火化」燈籠，無野玩就專心玩蠟燭，然後再因餅罐裡面d蠟太多，加上我識好多周邊既小朋友都係d「非益智類別」人士，所以好快就會開始「起壇作法」。大家都係以「放火」為目的，然後再以火燒得最大最高為標準！大家果陣都係好high，好開心，因為細路多數鐘意玩火，一年一次能夠放縱，真係老虎都唔得比佢停架嘛！

不過，俗語有云「老虎屁股摸不得」，危險必然需要付出代價，記得當時細個有個幾frd既同村小朋友，就因此被燒傷，本人與眾小朋友親眼目睹，而且都幾kam下，使我記憶尤新。

記得有年中秋節，數算當年應該係本村細路最多最頂盛既年頭，村內有好多細路都會落黎玩蠟燭燈籠之類…包括本人在內，當年樓上既「青梅竹馬」朋友「婷婷」都會一齊「拖手仔」落街玩（純真到…大家係咪有想嘔既感覺？），果個細路個名已經唔太記得（其實係費事講），只係記得佢係村內幾活躍既「細路」，果陣大家一齊煲蠟，火升得好快，大家開始得意忘形，有人開始加蠟燭、收集蠟燭紙盒放落火堆，然後倒水「加大火力」。

倒水落去，當然等同「火上加油」，不過頭上所講呢位小朋友並不滿足，於是，佢唸都無唸就除褲扮「消防喉」「英勇救火」…忽然，一時搶火，說時遲那時快，火舌突然吐出！

當堂一記「火烤禾花雀」！佢立即痛極大叫，滾地掙扎…但至可憐既係，當時既細路（包括我同婷婷在內）無一個人同情佢之餘，有的大笑、有的大呼「抵死」！！無錯，細路哥係好直率既，對於個人的喜惡，唔會有所保留，可想而知佢其實都唔係幾受人歡迎。

幸好，當時剛好警衛行過，並立即報警，救護車立即送入醫院。後來聽講沒大礙，只係要做「者者仔植皮手術」。

佢的確好慘，因為燒傷邊度都無所謂，最重要最弱雞果個位莫講話燒，就算輕輕拍一拍都會痹啦！不過令我最為記憶尤深既，就是佢響「出事」前果一刻，佢除褲露b之後，佢檸轉頭對我回眸，面帶微笑，好似做緊一d好重要，又好威水既事，只是…佢無唸過幾秒之後，佢即將變成「禾花雀照燒」咁解者……

最後更新: 27-09-2007 11:14